Pokahorn

Öryggi við barnaburð

2011-07-28T22:10:00.000Z

Núna er ég búin að íslenska greinina um öryggi sem ég setti hér inn um daginn. Ég hef bætt við stuttri málsgrein í lokin: atriði um öndun barnsins sem er mikilvægt að vita.
Lesa meira...

Manduca

2011-07-20T15:53:00.002Z

Eftir nokkra umhugsun og stutta prufukeyrslu þökk sé Soffíu, þá ákvað ég að kaupa mér Manduca formaðan burðarpoka um daginn. Það var orðið fyrirséð að ég myndi þurfa aðeins meiri "heavy duty" græju fyrir langar gönguferðir og fleira, þá var ofna sjalið of fyrirferðamikið, BabyHawkinn of fínn og hringasjalið veitti ekki nógu góðan stuðning. Kominn tími á að fjárfesta í formuðum burðarpoka! Þeir eru oft sérhannaðir fyrir langan burð, með góðar axlarólar og mittisólar til að styðja vel við þann sem ber. Ég hafði prófað Beco Butterfly áður - en af ýmsum ástæðum hentaði hann mér ekki.

Þá var fyrrnefnd Soffía tilbúin til að lána mér Manduca pokann sinn til að prófa í smá tíma, þar á meðal í eina góða gönguferð. Ég ákvað nánast strax að fjárfesta í mínum eiginn poka. Elín gaf honum fljótlega A+ einkunn með því að sofna á bakinu á mér, en það var margt fleira sem sannfærði mig.

Fyrst vil ég nefna þægindin. Mittisólin á Manduca er breiðari en gengur og gerist, og veldur því að stuðningurinn við mittið er ótrúlega góður. Barnið er nánast þyngdarlaust! Axlarólarnar eru vel fóðraðar og hafa aldrei valdið mér óþægindum. Ég dreg þá ályktun að pokinn sé þægilegur fyrir barnið líka, þar sem Elín sofnar mjög auðveldlega í honum og er reyndar sofandi á bakinu á mér einmitt meðan ég skrifa þetta. Ólarnar er hægt að stilla á mjög breiðu sviði til að henta öllum líkamsgerðum. Hægt er að hækka og lækka bakið á pokanum með einföldum rennilás, og innbyggðu nýburainnleggi er smellt á sinn stað fyrir yngstu börnin. Það er líka innbyggð hetta sem hægt er að rúlla upp í sérstakan vasa, hún kemur sér mjög vel þegar barnið sofnar. Það tók mig mjög stuttan tíma að læra að gefa brjóst í pokanum, og ég var ansi stolt af því að hafa farið í fjallgöngu fyrst með Elínu framan á mér að drekka, getað síðan sveiflað henni yfir á bakið þar sem hún svaf lungann úr göngunni, sveiflað henni síðan aftur framan á mig og gefið henni aftur að drekka í lok göngunnar. Ansi gott, þó ég segi sjálf frá.

Það finnst einnig strax við fyrsta burð að öryggið er í fyrirrúmi við hönnun pokans. Mittisólin er með þriggja hnappa smellu sem er aðeins hægt að opna með báðum höndum og öryggislykkjur eru við allar smellur. Pokinn sjálfur er úr sterku efni sem er þó ekki stíft, heldur mjúkt og sveigjanlegt. Stutt ól er á milli axlarólanna til að varna því að þær renni til hliðanna.

Þrátt fyrir að vera vel stillanlegur og styðja vel við bæði barn og burðardýr, þá nær Manduca að komast hjá því að vera fyrirferðarmikill eða ófríður. Lykkjur eru til staðar til að halda við langa enda frá smellunum, hönnunin er stílhrein og pokinn er til í fallegum litum.

Ég er hæstánægð með Manduca pokann minn og hlakka til að nota hann mikið næstu 3-4 árin, eða á meðan Elín vill enn láta bera sig. :) Hægt er að kaupa Manduca burðarpoka frá Hönd í Hönd eða Bambus.is. Soffía tekur iðulega með sér Manduca þegar hún er með burðarpokakynningar, þið getið fylgst með Hönd í Hönd eða Pokahorni á Facebook til að vita hvenær næsta kynning verður.

Safe Babywearing / Öruggur barnaburður

2011-06-29T15:53:00.001Z

Hér á eftir koma nokkrir punktar sem vert er að hafa í huga til að gera barnaburð öruggan og þægilegan fyrir alla. Greinin er á ensku í bili, en ég mun þýða hana þegar tími gefst til. Greinin er upprunalega af Pokabörnum, færð hingað með leyfi frá vefstýru.

Lesa meira...

Garðvinna með barn á bakinu

2011-06-13T18:28:00.000Z

Núna um helgina kom loksins nógu gott veður til að setja upp litla vermireitinn okkar! Eftir að búið var að gera helstu erfiðisvinnuna fyrir mig(skrúfa saman spýtur, negla reitinn niður og stinga upp grasið) gat ég hent í hann mold og slétt úr henni. En fyrst henti ég litlu rófunni upp á bak í ofna sjalið mitt og setti á hana sólhatt! Við skemmtum okkur vel úti í sólinni, ég rakaði og skottan fylgdist vel með, hæstánægð.

Ég hafði séð sjálfa mig í hyllingum með barn á bakinu við garðvinnu síðan vorið fór að láta sjá sig - loksins varð það að veruleika! Yndisleg upplifun. Við erum orðnar nokkuð góðar í að nota ofna sjalið til að bera hana á bakinu, þetta er ansi snúið í fyrstu tilraun en með reglulegri æfingu og þolinmæði verður þetta að ómetanlegum hæfileika. Ég hef hingað til æft mig í svokölluðum "rucksack" burði(hér er myndband), sem er nokkuð einfaldur og fljótlegur. Mér finnst gott að binda sjalið í tíbetskum stíl, þar sem halarnir eru þræddir í gegnum axlaólarnar til að létta álagið á öxlunum.

Núna nálgast 17. júní óðfluga og við hlökkum til að rölta niður í bæ með litlu rófuna í burðarpoka!

Babyhawk

2011-06-09T13:24:00.000Z

Fyrir nokkrum vikum síðan fengum við sendan yndislegan Babyhawk til okkar - mjög fallegan grip sem við höfðum sérpantað af vefsíðu þeirra eftir að ég prófaði sömu græju á burðarpokakynningu sem Soffía sá um í apríl. Við erum núna búin að nota Babyhawkinn okkar reglulega og erum hæstánægð!

Fyrsti göngutúrinn í Babyhawkinum!

Babyhawk er svokallaður "mei tai" eða asískur burðarpoki sem hægt er að lesa meira um undir flokknum "Burðargræjur" hér að ofan. Þeir eru saumaðir í Kaliforníu í Bandaríkjunum og fyrirtækið stofnaði móðir sem vildi koma sínum eigin hugmyndum um góða barnaburðargræju í framkvæmd. Á vefsíðu Babyhawk er hægt að velja sér liti og mynstur eftir eigin smekk, sem er stórskemmtilegt en líka svolítið erfitt þar sem úrvalið er gjörsamlega ótrúlegt! Við enduðum á því að velja espresso-litað efni með mynstri sem kallast "hushabye sage", og dúnmjúku espresso-lituðu minky efni á bakhliðinni.

Babyhawkinn er auðveldur í notkun og okkur finnst hann í raun þægilegri en Beco Butterfly pokinn sem við höfðum áður prófað, sem er með smellum en ekki bundinn. Þetta er misjafnt milli fólks, en okkur fannst mei tai stíllinn þægilegri þar sem ekki þarf að stilla lengdir á neinum böndum þegar við skiptumst á að nota pokann. Maður bara bindur nokkra hnúta og fer af stað! Mér hefur fundist nokkuð auðvelt að koma Elínu á bakið á mér, sem mér fannst ansi mikið basl með ofna sjalinu. Auk þess eru böndin þægileg og nokkuð nett, og ekki skemmir fyrir að mynstrið er einstaklega fallegt. Pabbinn er einnig hæstánægður og finnst þægilegt að nota pokann.


Svona á að vaska upp! :)

Einmitt núna er litla títlan framan á mér í pokanum. Hún er með örlítinn hita greyið og það er yndislegt að geta gefið henni þá nálægð sem hún þarf núna án þess að fórna handleggjunum alveg. Hægt og rólegt rugg fram og aftur í nokkrar mínútur á meðan ég skrifa færsluna, hún leggur höfuðið upp að mér og lygnir aftur augunum. Ómetanlegt. :)

Heimasaumað hringjasjal

2011-05-05T18:49:00.000Z

Það er tilbúið!

Ég byrjaði á þessu hringjasjali fyrir nokkrum dögum og kláraði það í dag, nokkrum mínútum eftir að hringirnir duttu inn um lúguna frá Bambus.is. Ég er hæstánægð með gripinn og veit að hann verður mikið notaður í framtíðinni! Við fórum í göngutúr út í búð í dag með Elínu í sjalinu og það virkar stórvel.

Það er hafsjór af upplýsingum á netinu um það hvernig er hægt að sauma sín eigin burðarsjöl og -poka. Síðurnar sem ég notaðist við voru leiðbeiningar á heimasíðu Maya Wrap, og á vefsíðunni Sleeping Baby. Efnið er bómullarcanvas, með fjólubláu og hvítu doppóttu skábandi á jöðrunum, allt úr Föndru.

Ég sem hef ekki saumað mikið um ævina átti nokkuð létt með þetta - ef þig langar að prófa að sauma þína eigin burðargræju þá mæli ég með því! Þetta var þrælgaman og lærdómsríkt.

Grein: Að snúa fram

2011-05-04T15:36:00.000Z

Texti eftir Dr. Evelin Kirkilionis

Ég er ekki hlynnt því að börn séu borin í stöðu þar sem þau vísa frá líkamanum. Með þess konar burði er farið á mis við nánast alla kosti burðar, sem snúa að þætti beinagrindarinnar. Börnin eru ekki lengur í þeirri fótastöðu sem kemur í veg fyrir mjaðmalos (Hip dysplasia), en þessi (framvísandi) staða ýtir frekar undir það.

Lesa meira...

Grein: Babies Need Their Mothers Beside Them

2011-04-28T22:57:00.003Z

Hér er grein eftir Dr. James J. McKenna, um samsvefn(co-sleeping), söguna á bakvið hann og tengslin sem myndast á milli móður og barns þegar þau sofa hlið við hlið. Dr. McKenna er prófessor í mannfræði og stýrir rannsóknarstofu við Notre Dame Háskólann sem rannsakar samsvefn mæðra og ungbarna. Greinin er flutt af vefsíðu Pokabarna með leyfi.

Lesa meira...

Grein: Kengúruaðferðin

2011-04-26T22:28:00.002Z

Árið 1979 í Bogota í Kólumbíu kom fram kenning um ágæti húð við húð snertingu móður og barns. Aðferðin kom fram á sjónasviðið sökum fátæktar í Kólombíu. Fyrirburar sem ekki höfðu kost á að fara í hitakassa voru settir á bringu móður, sem svipar til þess sem þekkist hjá kengúrum. Rannsóknir hafa sýnt fram á að börn hafa betri stjórn á líkamshita, betri öndun, eru værari, gráta minna, nærast betur og ná betri djúpa svefninum.
Lesa meira...

Náttúruhljóð

2011-04-24T16:19:00.000Z

Hér er yndisleg síða þar sem þið getið sett saman ykkar eigin náttúruhljóð. Þetta myndi henta mjög vel ef ykkar barn sefur betur við bakgrunnshljóð, ég mun líka nýta mér þetta við hugleiðslu og bókalestur þegar ég byrja aftur í skóla í haust. Uppáhalds blandan mín er rigning, skógarþrestir og óróahljóð.

Pokahorn er komið á Facebook! Þetta ætti að auðvelda öllum að fylgjast með síðunni. Ég læt vita í hvert skipti sem ný færsla er skrifuð. Þarna mun ég líka láta vita ef einhver er að t.d. áætla burðarpokakynningar eða taubleyjumarkaði. Endilega deilið síðunni með nýjum foreldrum eða áhugafólki um barnaburð, taubleyjur og aðra þætti kærleikauppeldis (e. attachment parenting). :)

Bestu taubleyjurnar

2011-04-22T23:04:00.000Z

Parenting Magazine hefur nú skrifað frábæra, ítarlega grein um taubleyjur og vinsælustu taubleyjuvörumerkin í dag! Þeir sem eru að velta fyrir sér taubleyjum en finnst þessi heimur yfirþyrmandi(eins og mér fannst í upphafi) geta andað léttar því þessi grein ætti að gera valið mun auðveldara. Hún útskýrir öll helstu orð eins og t.d. "fitted", "prefold", "all-in-one" og fleiri sem flestir byrjendur kannast ekkert við, og telur upp nokkur vinsæl vörumerki sem hafa reynst foreldrum og bleyjubörnum vel. Þetta er allt frá einföldum gasbleyjum yfir í girnilegar vasableyjur og all-in-one.

Ef þú eða einhver sem þú þekkir er að velta fyrir sér taubleyjum, þá mæli ég sterklega með þessari grein. Það er einnig hafsjór af upplýsingum á vefsíðu Barnavara, og á Náttúruleg.net, og hér er síðan gott íslenskt taubleyjuspjall þar sem ýmsum spurningum er svarað og mörg vandamál leyst.

Taubleyjunotkun virðist vera að aukast hér á landi, sem og um allan heim, sem er auðvitað hið besta mál. Sérstaklega hérna á Íslandi þar sem heita vatnið og orkan eru svona ódýr og umhverfisvæn ættu sem flestir að nýta sér taubleyjurnar!

Burðarpokakynning

2011-04-16T12:08:00.000Z

Síðastliðinn miðvikudag fór ég á burðarpokakynningu á Iðunnareplinu. Soffía Bæringsdóttir, doula, sá um kynninguna og kenndi nokkrum áhugasömum mæðrum um kosti barnaburðar og mismunandi græjur. Hún var þarna mætt með langt ofið burðarsjal, Babyhawk mei tai og Manduca burðarpoka sem allir máttu prófa. Við Elín prófuðum Babyhawk og vorum svo ánægðar með hann að það endaði með því að við pöntuðum einn svoleiðis og bíðum nú spennt eftir að fá hann sendan! Hér fyrir neðan eru nokkrar myndir frá kynningunni.

Iðunnareplið
Hönd í Hönd doula

Hér er Soffía að sýna hvernig má bera barn á bakinu í löngu burðarsjali.

Það er líka hægt að nota burðarsjalið eins og hringjasjal
með því að binda sérstakan hnút, en sjalið þyrfti þá að vera styttra.

Elín unir sér vel í gullfallegum Babyhawk mei tai.

Lítil skotta prófar Manduca burðarpoka.

Þetta var mjög gaman og ég hvet alla til að fylgjast með Iðunnareplinu á Facebook til að vita meira um fleiri kynningar, mömmumorgna og margt fleira skemmtilegt.

SnuggyBaby á Etsy

2011-04-01T17:06:00.003Z

Mynd: SnuggyBaby

Ég var að skottast um hina yndislegu vefsíðu Etsy um daginn og rakst á SnuggyBaby, sem framleiðir falleg hringjasjöl og löng sjöl. Hún saumar líka bráðsniðug pokasjöl fyrir eldri börn til að bera dúkkur og bangsa! Ég er sérstaklega heilluð af hringjasjalinu hér til hliðar, mynstrið er svo bjart og skemmtilegt.

Þessa dagana er ég í leit að efni til að sauma mitt eigið hringjasjal - meira af því síðar! Ef þið hafið reynslu af því að sauma ykkar eigið sjal, endilega látið vita í athugasemdum. Hvaða efni er best að nota? Hvar er hægt að finna falleg mynstruð efni á góðu verði?

Ég bjó til ferskt og skemmtileg logo fyrir síðuna í dag og fiffaði aðeins í útliti og uppsetningu, vona að þetta falli í kramið. Var rétt í þessu að taka eftir því hvað litasamsetningin er lík sjalinu á myndinni... það hlýtur að hafa gefið mér ómeðvitaðan innblástur!

~ Dagný

Pokahorn!

2011-03-30T16:31:00.008Z

Sælinú og verið velkomin á síðuna mína!

Núna held ég að flest sé tilbúið til að ég geti opnað fyrir almenning. Það eina sem er svolítið tómlegt er greinasíðan, en það kemur til með að lagast mjög fljótlega. Það er a.m.k. nóg í boði til að nýtast fólki að einhverju leiti. Bloggið mun ég nota til að segja frá ýmsu tengdu efni síðunnar, deila fallegum burðargræjum, nýjungum og þess háttar.

Við Elín bjóðum ykkur hjartanlega velkomin!

Það eru margar spennandi hugmyndir sem geta svo orðið að veruleika síðar, t.d. íslensk leiðbeiningarmyndbönd, nýtt lén, gestahöfundar o.fl. Seinna meir gæti svo vel verið að ég færi út kvíarnar og fjalli um taubleyjur, matargerð o.s.frv. ef lesendum þóknast svo.

Þangað til vona ég að gestir hafi gaman af því að skoða sig um og fræðast um hið yndislega fyrirbæri sem kallast barnaburður. :) Ef þið hafið einhverjar hugmyndir er ykkur velkomið að skrifa athugasemd og láta mig vita!
~ Dagný